Sad Poetry zamiir-e-asr meN kabhii navaa-e-dard meN kabhii

kaduuratoN ke darmiyaaN adaavatoN ke darmiyaaN
tamaam dost ajnabii haiN dostoN ke darmiyaaN

(kaduurat : strife; adaavat : animosity; darmiyaaN : midst)

... zamaanaa merii daastaaN pe ro rahaa hai aaj kyuuN
yehii to kal sunii gayii thii qahqahoN ke darmiyaaN

(qahqahe : laughter)

zamiir-e-asr meN kabhii navaa-e-dard meN kabhii
suKhan-saraa to maiN bhii huuN sadaaqatoN ke darmiyaaN

(zamiir-e-asr : conscience of the times; suKhan-saraa : to speak; sadaaqat : truth)

shauur-e-asr dhuuNdtaa rahaa hai mujhko aur maiN
magan huuN ahd-e-raftaGhaaN kii azmatoN ke darmiyaaN

(shauur-e-asr : style of the times; ahd-e-raftaGhaaN : bygone era; azmat : greatness)

abhii shikast kyaa, ke razm-e-aaKhirii ek aur hai
pukaartii hai zindagii haziimatoN ke darmiyaaN

(haziimat : defeat)

hazaar burdbaariyoN ke saath jii rahe haiN ham
muhaal thaa ye kaar-e-ziist vahshatoN ke darmiyaaN

(burdbaarii : kaar-e-ziist : life’s work)

ye sochte haiN kab talak zamiir ko bachaayeNge
agar yuuN hii jiyaa kare zaruuratoN ke darmiyaaN